Yn ystod Pythefnos Gofal Maethu, mae Darren Millar AS Gorllewin Clwyd yn tynnu sylw at rôl hanfodol gofalwyr maeth yn y gymuned a'r angen dybryd am fwy o deuluoedd maeth yma yng Nghymru.
Pythefnos Gofal Maeth yw ymgyrch fwyaf y DU i godi ymwybyddiaeth o ofal maeth, a gyflwynir gan yr elusen faethu flaenllaw, The Fostering Network, rhwng 13 a 26 Mai.
Thema Pythefnos Gofal Maeth 2024 yw #FosteringMoments.
Ar hyn o bryd, mae 100,437 o blant mewn gofal yn y DU a thri chwarter ohonyn nhw'n byw gyda theuluoedd maeth. Mae gormod o'r plant hyn – tua thraean o'r plant mewn gofal yng Nghymru – yn gorfod gadael eu hardal awdurdod lleol gan nad oes modd dod o hyd i leoliad i ofalu amdanyn nhw gerllaw.
Meddai Darren:
“Mae gofal maeth yn darparu amgylchedd teuluol diogel a meithringar i blant.
“Mae gwir angen mwy o deuluoedd maeth ledled y DU i sicrhau bod pob plentyn yn cael y gofal sydd ei angen arno ac yn cael digon o gymorth yn ei gymuned. Yn benodol, mae angen teuluoedd maeth sy'n gallu cynnal grwpiau o frodyr a chwiorydd, er mwyn sicrhau bod modd gofalu am blant gyda'i gilydd ac nad ydynt yn colli eu cysylltiadau â'u teulu.
“Ym mis Mawrth 2023, roedd 7,210 o blant yng Nghymru yn derbyn gofal, cynnydd o 12.5% o gymharu â 6,405 bum mlynedd yn ôl yn 2018. Mae hyn yn cynnwys 4,955 o blant mewn gofal maeth yn 2023, cynnydd o 5.4% o gymharu â 4,700 yn 2018.
“Er bod nifer y plant mewn gofal, gan gynnwys gofal maeth, yn parhau i gynyddu yng Nghymru, mae nifer yr aelwydydd maeth yn gostwng.
“Mae'r Rhwydwaith Maethu wedi amcangyfrif bod angen tua 400 yn fwy o deuluoedd maeth yng Nghymru i ddarparu gofal i blant a phobl ifanc yn eu cymunedau.
“Yn union fel nad oes dau blentyn yr un fath, mae angen i ofalwyr maeth fod o gefndiroedd gwahanol gyda'r profiadau bywyd, sgiliau a rhinweddau gwahanol i helpu i ddiwallu anghenion plant a phobl ifanc mewn gofal maeth. Gallwch fod yn ofalwr maeth heb unrhyw gymwysterau penodol, a does dim angen i chi fod â phlant eich hun. Yr hyn sy'n bwysig yw y gallwch gefnogi, meithrin a gofalu am blant na allant fyw gyda'u teuluoedd eu hunain.”
Am fwy o wybodaeth am faethu, ewch i Advice & Information | The Fostering Network
